Sport - jismoniy va ruhiy salomatlik garovi

Mutaxassislar ta’kidlashicha, sport bilan muntazam shug‘ullanish  insonni jismonan chiniqtiribgina qolmay, ruhiy jihatdan tetiklashtiradi, salomatligini mustahkamlaydi. Ayniqsa, ta’lim bilan bog‘liq sohalarda talabalar uchun sportning har qanday turining  ahamiyati beqiyos ekanini “TIQXMMI” Milliy tadqiqot universiteti "Ekologiya va huquq"  fakultetida ta’lim oluvchi har bir talaba chuqur anglab yetishmoqda.

Universitetda talabalarning mini futbol, stol tennisi, basketbol, voleybol, shashka-shaxmat  bilan muntazam shug‘ullanishi bevosita Universitet rektorining, “Yoshlar bilan ishlash, ma’naviyat va ma’rifat bo‘limi”ning, shuningdek, “Jismoniy tarbiya” kafedrasining e’tibor markazida. Buning uchun barcha shart-sharoitlar yaratilgan. Joriy yilning 19-aprel kuni Universitet sport majmuasida “Ekologiya va huquq” fakultetining 1-2-3-bosqich talaba-yoshlari “Rektor kubogi”ga saralash musobaqalariga qatnashish uchun  yig‘ildi. 

"Ekologiya va huquq" fakulteti dekani B.Norov  sport musobaqalarini ochish uchun so‘zga chiqib jamoa ishtirokchilariga omad tiladi. “Rektor kubogi”ga saralash musobaqalari “Jismoniy tarbiya” kafedrasi mudiri M.Norqobilov  va kafedra o‘qituvchisi A.Xodjanovlarning hakamligi ostida  adolatli, murosalarsiz va qizg‘in tarzda bo‘lib o‘tdi. Sport turlari bo‘yicha g‘olib jamoalar aniqlandi. Musobaqa g’oliblarini tabriklaymiz, “Rektor kubogi”ni qo’lga kiritishga omad tilaymiz.